اسكريبت بقلم سوار
يعني أنت عايزني أوجع قلبها علشان أشوف غيرتها عليا !
قولت الجملة دي ل إسلام صاحبي كنا في خروجة كلنا في مطعم لما عرفوا إني متخانق مع مراتي .
يا دوب كاتبين الكتاب من شهرين وفرحنا بعد شهر ولكن لما قربنا من بعض بدأت تظهر الاختلافات فبقينا نتخانق كتير .
رد ببساطة أذهلتني
أه... لأن مش بس غيرتها هتبان لأ كمان هتعرف أنها مش بتلوي دراعك بزعلها وأن لو هي مشيت يجي بدالها عشرة..
عيوني وسعت وأنا مش مصدق اللي بسمعه بصيت ناحية صحابي فلقيتهم كلهم ساكتين و واضح أنهم متفقين معاه في رأيه .
خدت نفس وحاولت معليش صوتي علشان الناس حوالينا
ولا ستات الدنيا كلهم يعوضوني عنها وطبعا زعلها يفرقلي .... وكتير كمان .
اتكلم بسخرية وهو بيشرب من القهوة قدامه
خليك أنت عامل كدا لحد أما تتنك عليك ومتعملكش حساب ..
يا بني أدم افهم أنت لو معملتش كدا هتضمن وجودك ومش هتخاف لتسيبها ..
طيب ما تضمن وجودي وتطمن لاني فعلا مش هسيبها ليه أعيشها في قلق وخوف أنا جوزها يعني أكتر واحد لازم تحس معاه بالأمان ...
أكون أنا أول واحد يتعب قلبها يا سبحان الله...
ضړبت كف على كف من التفكير العقيم اللي بيفكروا بيه مراتي واللي المفروض هي أقرب حد ليا أوجعها بالشكل ده ...
أعيشها في قلق وخوف دايما وأحرق قلبها ...والحجة إني أشوف غيرتها .
هو أنت مبتشوفش اللي بيحصل مع غيرك عارف كام واحد اتخزوق لما عمل زيك كدا ...
اتكلمت بحدة
هو أنت ليه محسسني إني متجوز واحدة مش كويسة ما تحاسب على كلامك يا إسلام ..
اهدى يا مالك هو أكيد ميقصدش وأنت يا عم إسلام مبتعديش الكلام على عقلك ولا ايه...
بصيت لمحمد اللي بيحاول يهديني
العيب مش عليه العيب على اللي فضفضلكم من الأول بس غلطة ومش هتتكرر ...
بعدت ايده عني وأنا بقوم من مكاني وباخد حاجتي من على الطرابيزة ..
يا مالك استنى بس ..
مهتمتش لكلام حد بصيت عليهم نظرة أخيرة ولازالت نظرات السخرية في عين إسلام .
طلعت برا المطعم و وقفت وأنا باخد نفسي بسرعة وحاسس بدمي بيغلي فكيت زرار القميص في محاولة إني أقلل من الخنقة اللي جوايا .
مشيت في الشوارع وأنا بفكر في اللي اتقال بفكر أن لو الست هي اللي قررت تكيده براجل تاني وقتها هيجبها من شعرها ويقول كرامتي كراجل طيب وكرامتها ومشاعرها ....ليه نأذي أقرب الناس لينا لمجرد أننا نرضي شعور مريض جوانا .
خللت ايدي في شعري وأنا بلف بعيني في المكان محلات كتير جنب بعضها الأنوار كلها شغالة نظرا لأننا دخلنا على المغرب
غالبا دخلت في شوارع غريبة منغير ما أخد بالي ...
فتحت تليفوني لما جالي إشعار
