الجزء الثاني من قصة جن عاشق بقلم الكاتب جمال الحفني
شهرين على الحال دا وجوزي كل شويه يكلم ناس ويقولوله على حاجات اعملها وبعملها وبرضو بدون فايدة, يقولولي حطي مسك بين صوابعك وبحط.
جوزي يجيبلي ورق شجر والناس تقوله تحط الورق دا في مياه كتير وتقرا عليه قراّن وتستحمى منه وتشيل شوية في التلاجة وتشرب منه وكنت بعمل كدا وبرضو بدون فايدة.
وبمرور الوقت بدأت تحصل مشاكل بيني وبين جوزي لأتفه الأسباب والموضوع يكبر واروح بيت أبويا وأرجع وأروح بيت أبويا تاني, ولما حكيت لأهلي على اللي بيحصل معايا راح أبويا كلم اتنين يعرفهم وليهم في العلاج الروحاني, واحد منهم قال لأبويا إن دي أعراض جن عاشق وفيه جن مع بنتك وبيحصل معاها كذا كذا وقال كل حاجه بالظبط, ولازم اقعد معاه وتكون لينا جلسات مع بعض, وفعلا بابا خد منهم معاه هما الاتنين وفي اليوم اللي جايين فيه قولت لبابا إنهم مش هييجوا وفعلا محدش منهم جي.
كان أي حد يسمع بحكايتي ويحدد ميعاد ييجي فيه سواء وأنا في بيت جوزي أو وأنا في بيت أبويا مكانش بييجي في الميعاد, كلهم بلا استثناء.
مرات بابا كمان كلمت شيخ مشهور ومعروف بفك الحاجات دي وليه صيت في البلد عندنا, وحددت معاه ميعاد وقال إنه جاي وبرضو مجاش, أمي كلمته تاني راح اعتذر وقالها مريت بظروف شخصية واعتذر وحدد ميعاد تاني وبرضو في الميعاد مجاش ولما حاولنا نتواصل معاه معرفناش نوصله.
علاقتي بزوجي اتدهورت لحد ما قررنا الانفصال, وبعد ما انفصلنا وبعدت عن بيت جوزي بقيت أحسن جدا, وحالتي اتحسنت واللي كان بيحصل معايا توقف تماما, لكن كان بيجي مرة أو اتنين قبل البريود وباقي الشهر عادي جدا ومفيش حاجه.
كنت فاكرة إن كدا حالتي اتحسنت لكن للأسف لا ..
الجزء الثاني
قصة حقيقية
لو خلصت قراءة سيب تعليق عشان يوصلك الجزء التالت
ولو حصلت معاك قصة وحابب تشاركها معانا ابعتهالي في رسالة
#جن_عاشق
#إسقاط_نجمي
جمال الحفني
