اسكرييت كوني انتي بقلم منة سلطان

واللي أول ما شافتني قالتلي
_عرفي نفسك
حمحت بخفة وبهدوء رديت رغم فزعي من طريقتها
_تبارك عبد الحي عندي ٢٥ سنة خريجة فنون تطبيقية دفعة 2023 و...
قاطعتني وهي مركزة على ملفي قدامها
_ولما أنت خريجة فنون تطبيقية مبتشتغليش ليه بشهادتك
بلعت ريقي واتكلمت
_حاولت كتير لكن لسة ملاقتش فرصة ت...
قاطعتني تاني بنبرة صارمة
_تقديرك امتياز على مدار الخمس سنين وموجود قدامي أنك سيق واشتغلتي سكرتيرة في شركة تانية سبتي الشغل ليه
رمشت وأنا بصعوبة بتمالك نفسي بعد ما افتكرت سبب تركي للشغل اللي قبل ده واللي كان بسبب إني كهيئة وشكل لا أليق طبعا بشكل الشركة. 
_استغنوا عني بلا سبب.
ردت وهي بتركز بعينيها عليا وعلى شكلي ولبسي_بالأخص_
_مفيش حاجة بتحصل بلا سبب كل حاجة ليها سبب ودافع شغلك كان كويس هناك
حاولت أتشجع وأرد
_جدا وأنا أظن إني كنت متمكنة وكل ده موجود في ال CV مع حضرتك.
هزت رأسها وبعدها مدتلي ايديها بال CV وقالت
_تمام المقابلة انتهت دخليلي اللي بعدها.
انسحبت من المكان وخرجت وأنا حاسة بالظلم من كل حاجة بتحصلي وقبل ما أدي نفسي فرصة للإنهيار وقفني صوت السكرتيرة اللي قالتلي
_سيبي بيناتك هنا وهنبقى نكلمك.
كانت جملة غير مباشرة للرفض وعلى قد تعلقي بآخر أمل كان ليا إني أتقبل في الوظيفة دي على قد ما إتوجعت وحسيت بالقهر والحسړة أصل ليه هو شكلي ده أنا مسؤولة عنه! دي خلقة ربنا وأنا صابرة والله بس ليه نظراتهم بتوجع بالشكل ده!
_حاسبي يا آنسة .
ودي كانت آخر حاجة أسمعها قبل ما الدنيا تسود فجأة في وشي ومحسش بنفسي.

الإسكريبت ده إهداء خاص مني لكل بنت شايفة إنها محتاجة تكون أفضل عشان اللي حواليها مش عشانها هي أنا عاوزة أقولك إنك جميلة وواو في كل حالاتك أنت أبدا مش محتاجة تثبتي ده للي حواليك خليكي واثقة إن مش شرط جمالك يبقى في شكلك أو حتى في طريقة لبسك بالعكس ممكن يبقى في طريقتك وفي أخلاقك والأهم من كل ده ممكن جمالك يتمثل في علاقتك بربنا وفي مدى قربك منه.