قصة حقيقية بقلم جمال الحفني
تخيل لما جن يحاول يتجوز إنسية وأهلها يرفضوا بيعمل إيه
الكلام دا حصل سنة 1992 لما واحد اتقدم لخالتي وجدي رفض الشخص دا مصدقش إنه ممكن يترفض وحاول يبعت ناس وكدا لكن جدي برضو رفض ولإننا عايشين في أرياف والجهل عايش وسطنا قرر الشخص دا يعمل عمل لخالتي عشان يوقف حالها ومحدش يتجوزها
وفي ليلة بعد ما جدي وجدتي وخالاتي خلصوا عشا فجأة خالتي دي حست بصداع وألم شديد في جسمها ووقعت على الأرض حاولوا يشوفوا فيها إيه وفجأة صوتها اتحول لصوت راجل خشن مش كدا وبس خالاتي كمان صوتهم اتغير زيها وبقى جدي وخالي واقفين مش مستوعبين الموقف
الحمد لله جدي حافظ لكتاب الله وخالي كمان راحوا يقروا قران وخالتي واخواتها بدؤوا يجروا في البيت ويعملوا حركات غريبة بعيونهم وجسمهم وأغرب حاجه عملوها إنهم كانوا بيطلعوا على الحيط بصوابعهم ورجلهم عادي ليلة كانت مرعبة وبعدين الجن زي ما يكون حب يتفاهم مع جدي وقفت خالتي قدامه وجمبها خالاتي ساكتين وبدأت تتكلم بصوته قال لجدي إن اسمه علي وعاوز يتجوز خالتي وينزل بيها تحت الأرض وكل الفلوس والذهب اللي جدي يطلبه هيكون تحت أمره لكن جدي رفض
الجن قاله هخلي عيلتك أكبر وأقوى عائلة في البلد لكن جدي رفض
بعدها بدأ صوت الجن يتحول لصوت بنت غير صوت خالتي بدأت تحكي لجدي إنها متجوزه علي من زمان وعايشه معاه تحت الأرض كانت بتحاول تطمنه عشان يسيب بنته لكن جدي برضو رفض وبعدها البنت دي دخلت في موجة عياط وغيرة لأنها ملقتش حد يوقف جمبها زي جدي ما عمل وحكت لجدي حكايتها إنها يتيمة ومقطوعة من شجرة وحاجات غريبة كدا مش فاكراها
ومن بعدها بدأت خالتي تدخل في دوامات صرع وخوف وتشنج وشيوخ كتير بتيجي وتروح على البيت بدون فايدة
خالتي لمدة خمس شهور مبتقعدش دقيقة لوحدها سواء نايمة أو صاحية لازم حد معاها حتى لما بتدخل الحمام لازم يكون حد معاها
لحد ما في يوم لقوا شيخ كويس جدا وبدأ معاها العلاج وكان جايب نتيجة العلاج طبعا مبيكونش في يوم وليلة لكن كان هو الشيخ دا صح والعلاج هيكون على إيده بسبب النتايج اللي حققها مع حالة خالتي
وفي يوم تعبت بالليل بعد الساعة واحدة والحالة اللي فيها مش بتروح غير لما الشيخ يكون موجود ويقرا عليها خدها خالي وجدي بالعربية وقرروا يروح للشيخ البيت شوارعنا في الريف بالليل بتكون ضلمة أو إضاءتها قليلة وفجأة الجن اللي اسمه علي دا ظهرلهم وحاول يخليهم يعملوا حاډثة أو يتقلبوا في الترعة
خالي بصعوبة سيطر على العربية ووقفها على جمب وبدأ جدي وخالي يقروا قران والجن معاهم يزاول فيهم وخالتي راحت تصرخ وتستغيث بيهم
