اسكريبت بقلم سلمي بسيوني ذكري و يوسف 1

تايهة متعرفش أنا مين ولا في أيه!
الحمدلله 
قمت من على الكرسي ونزلت لمستواها عشان تستوعب كلامي
تعرفيني أنا صاحبة فريدة 
قالت بلهفة 
وأنا كمان 
سكتت شوية وبعدين قالت وراسها في الأرض
بس معدناش!
ليه كدا دي فريدة بتحبك أوي وبتحكيلي عنك كتير! 
رفعت عينها ليا تاني وقالتلي 
هي وحشتني أوي 
أمال مش بتلعبي معاها ليه 
سكتت شوية وأتكسفت فسألتها تاني
ردت عليا 
ندى قالتلي إن مامتها وباباها معدوش موجودين وكدا مش هتلاقي حد يذاكرلها ومش هتبقى شاطرة تاني وأنا كدا هبقى زيها ومامي هتزعل مني 
طيب لو حصل ومستواها بقى وحش نخاصمها 
سألت ببراءة
امال نعمل أي
نساعدها يا جنى 
مسحت على راسها وكملت كلام 
فريدة مامتها وباباها راحوا عند ربنا ودي ظروف صعبة ساعات كتير كلنا بيبقى عندنا ظروف صعبة يعني مثلا مكن حد يبقى عنده ظروف صعبة في صحته فيمرض كتير أو حد يكون عنده ظروف صعبة فميبقاش معاه فلوس أو حد يبقى عنده ظروف صعبة فميعرفش يروح المدرسة ويتعلم وظروف صعبة كتير أوي المفروض الظروف دي تقربنا من بعض مش تبعدنا أبدا 
إزاي
يعني تعلمنا نساعد بعض ونقف جنب بعض
ونقرب من بعض أكتر نخفف عن بعض ونبقى صحاب شاطرين 
هزت راسها وفهمت كلامي
مش نبعد ونخاصم بعض يا جنى 
سكتت شوية وبعدها قالت 
أصلا ندى طلعت كدابة فريدة لسه شاطرة عادي بس هي أكيد زعلانة مني صح
حركت راسي بآه وأنا بصالها بأسف
طب أعمل أي أصالحها إزاي
قلتلها ببساطة 
أحضنيها 
بس 
حركت رآسي بآه وقولت 
لما فريدة بتزعل مني وأروح أصالحها بحضنها وبقولها أنا آسفة فبتضحك على طول وبنتصالح 
ضحكت بعد ما كانت قلقانة وقالت ببراءة 
هعمل كدا 
خلاص اتفقنا
هزت راسها بآه
ممكن آخد حضڼ 
ضحكت لما فتحتلها دراعي فحضنتني ومشيت بس قبل ما تمشي وقفتها المس وقالتلها 
ندى مش كدابة يا جنى هي بس فاهمة غلط زي ما كنت أنت فاهمة غلط وأنا هتكلم معاها وهفهمها الصح ماشي 
هزت راسها لما فهمت وسمحتلها المس تمشي فطلعت فصلها تاني كانت بنت على الفطرة جميلة وبريئة أوي يارب يكونوا صحاب كويسين لبعض 
كنت هايلة يا مدام ذكرى شكرا ليك 
كمل يوسف على كلامها وهو مبتسم وباصصلي وقال 
دي حقيقة عالجتي الموضوع بشكل جميل أوي 
ابتسمت بهدوء 
أنا معملتش حاجة أتمنى المشكلة تتحل بس 
متقلقيش أنا هتابعهم من بعيد وأطمن 
سلمنا عليها وكان فاضل وقت بسيط على ميعاد الخروج فاستنينا برة في الجنينة 
يوسف راح جابلنا قهوة ورجع قعد جنبي كل واحد بيشرب قهوته وهو ساكت لحد ما قال من وسط الصمت 
المفروض الظروف دي تقربنا من بعض مش تبعدنا أبدا 
كان كلامي إلي قلته للبنت جوا في المكتب 
أخدت نفس عميق
قطمني قطمني ما هو حقك 
ضحك نص ضحكة وسكت من الموضوع دا وقال بعد ما أخد بوق من المج 
بس عرفتي تتصرفي بطريقة حلوة أوي حليتي الموضوع بطريقتك بكل حنية 
كان باصصلي زي زمان بصة وقعت قلبي وزغزغت مشاعري دي عينيه الحقيقية عينيه الحقيقية مش الكره والجمود إلي كان مصدره 
تهت من نظرته فحمحم وقال وهو بيضحك 
أنا متخيل لو كنت أنا إلي رحت كنت بهدلت الدنيا وطلعت من المدرسة وهم ماسكين شعور بعض 
ضحكت وقولتله 
مش للدرجادي يعني!
يبنتي لا خالص ما أنت عرفاني ملييش في حوارات العيال دي خالص أنا لو قعدت مع عيل بيزن ممكن يجرالي حاجة 
ضحكت بعد فترة كبيرة الضحكة مزارتنيش كدا
ورديت عليه 
أنا بحب الأطفال أوي وبعرف أتعامل معاهم من حبي في الموضوع اشتغلت الفترة إلي فاتت في حضانة والولاد هناك بيحبوني أوي سبحان الله 
كان باصصلي وحاطط إيده على خده بيسمعني أتعدل بعدها وقال 
متأكد إن ربنا هيعوضك يا ذكرى 
ابتسمت برضا وقولت 
وأنا كمان 
بلع ريقه وقالي بهدوء 
أنا آسف مرة تانية على إلي قلته إمبارح 
ابتسمت بشويش 
أنا مش زعلانة من الكلمة نفسها أتقالتلي كتير
أوي وكنت بسمعها أكتر من إزيك حتى دا إلي كان تاعب نفسيتي أوي قبل الطلاق لو اتكلموا بيوجعوا ولو متكلموش عنيهم بتتكلم وتوجعني بردو إلي زعلني إمبارح إنها كانت منك مش من أي حد تاني 
أتنهد بتقل وبص في عنيا 
تفتكري ممكن يكون لينا فرصة تاني 
حركت راسي بحيرة وأنا سرحانة
مش عارفة!
غيرت الموضوع بسرعة قبل ما أقوله بحبك وسألته
أنت معدتش بتلبس كرفاتة ليه صحيح! 
ضحك وقال
مش بعرف أربطها 
بص في عنيا وقال 
أو مش عايزة أتعلمها يمكن يمكن يكون لسه عندي أمل 
عنيه ربكتني تاني هو نفسه مش فاهم هو عايز أي لسه ودا خلاني سكت ومعرفتش أرد لحد ما 
جه ميعاد الخروج والولاد بدأت تطلع فوقفنا نستناها أول ما طلعت جريت عليا وهي مبسوطة وحضنتني فقال يوسف بتذمر 
والله طب وخالو
خرجت من حضڼي وحضنته هو 
أنت بتيجي على طول ذكرى أول مرة تيجي المدرسة 
ماشي يا ستي تيجيوا ناكل آيس كريم 
فريدة فضلت تنط من الحماس فحركت راسي بآه وأنا بضحك عليها 
و إحنا في المحل فريدة قعدت تحكيلنا عن صاحبتها إلي فهمتها ورجعوا صحاب تاني 
وأنت بقى صالحتيها 
أيوا خلاص أتصالحنا يا ذكرى 
بسهولة كدا
ما هي كانت فاهمة غلط فخلاص طلاما فهمت الصح وقالت آسفة يبقى نتصالح!
ابتسمت بغلب وأنا ببصله وفهمني 
ياريت الدنيا كانت سهلة كدا !
قربت وحضنت فريدة وبوستها 
بس أنت جميلة أوي يا فيرو وقلبك طيب 
يوسف ناولها الآيس كريم بتاعها 
عملتوا أي بقى بعد
ما أتصالحتوا
أكلنا سوا يا خالو أخدت نص الساندوتش بتاعي وأخدت نص الساندوتش بتاعها وأنت ذكرى بعد ما بتصالحي حد مخاصمك بتعملي أي 
بصيتله وأنا برد عليها
هحضر نجاحه وأسقفله عشان نفسي أوي أعمل كدا 
وأنت يا خالو
ابتسم وهو بيقول 
ممكن يربطلي الكرڤاتة مثلا 
قلبي فرح من الكلمة 
وبعد وقت طويل من التفكير والمحاولة
جت لي مكالمة قبل ما أنام من رقم أستنيته كتير فتحت وسمعت صوته 
بكرا عندي إيڤينت مهم هبقى السبيكر فيه 
عنيا لمعت وأتمنيت ليه النجاح من قلبي
بجد! ربنا يوفقك ويبقى أحسن إيڤينت 
كنت ھموت وأروح نفسي أشوفه ناجح وأبقى جنبه أسقفله وقلبي يطير بيه 
رد عليا وقال بصوت هادي 
أنا محتاجك تربطيلي الكرڤاتة يا ذكرى 
عنيا لمعت أكتر وأخدت نفس طويل كأني وصلت البر أخيرا بعد عاصفة كبيرة 
حركت راسي وأنا ماسكة التليفون كأنه شايفني 
وقولت ومشاعري بتهرب في كلامي 
وأنا هاجي على الميعاد 
قفلت المكالمة وضميت التليفون لقلبي ودموعي نزلت وأنا بتمنى يكون بجد 
تاني يوم الصبح
ست واعية بقلب بنت صغيرة 
نزلت من البيت وفي إيديها كرڤاتة جديدة وقلب بيسبقها واقفه قدام القاعة إلي خلاص أتملت على عينها الأنتظار أكل قلبها لحد ما شافته قدامها لابس بدلة تجنن وساعة جديدة شكله زي القمر 
قرب لعندي بسرعة وبصلي بحب نظرته إلي وحشتني وعينيه إلي أستنيتها ليالي! 
حلمي بيتحقق!
أي الحلاوة دي كلها 
قلبي داب وأنا برد عليه وبهرب من الكلام 
يلا عشان أتأخرت!
طب والكرڤاتة!!! 
أوف نسيت طلعتها بسرعة من شنطتي
وبدأت ألفها حوالين رقبته وأربطهاله وهو مش باعد عنيه عني فارتبكت 
متبصليش كدا !! عايزة أخلص! 
ضحك فكملت الربطة وعدلت البدلة وأنا بصاله بحب وبقول كلمتي المعتادة 
كدا زي القمر! 
ضحك ومسك إيدي ودخل القاعة 
وبعد كلام كتير قاله وشرحه وقفت وسط الناس وسقفت وقلبي طاير من الفرحة 
وأخيرا قلبي هدي 
سلمى بسيوني 
ذكرى و يوسف 
تمت