اسكريبت بقلم روان سالم محمد
رافضة فكرة إننا نروح المستشفى لمجرد برد لكن ليل خدني ڠصب عني بردو عشان يطمن
دخلنا للدكتورة وكتبتلي على شوية أدوية وإحنا ماشيين في المستشفى وقفنا أنا وليل قدام باب معين... كان باب لدكتورة نسا وتوليد
بصيت لليل وهو بصلي كذلك وابتسم وقالي بصوت هادي وهو بيشاور على الباب براسه
تاجي نجرب
ضحكت وهزيت راسي برفض
بلاش... هندخل ليه وإحنا عارفين النتيجة
مين قال إننا عارفين اللي يعرف ربنا.. إحنا لسا مكشفناش عشان نعرف! تعالي بس مش هنخسر حاجة لو جربنا!
وفعلا أخدني ودخلنا للدكتورة كشفت عليا وليل كان ماسك في إيدي وباصصلي بحب بيطمني بعنيه وبإيديه اللي كل شوية تضغط على إيدي لو حسني متوترة أو خاېفة
لقينا الدكتورة بتكلمني
قولتيلي بقى إنك عندك إنقطاع طمث مبكر مش كدا
اه يا دكتورة أنا مكنتش عايزة أدخل اكشف أصلا لأني عارفة النتيجة من دلوقتي بس يعني جوزي صمم إننا ندخل ونكشف
طب كويس إنه صمم عشان تلحقوا تجهزوا حاجات البيبي
بصتلها باستغراب أنا وليل
حاجات إيه لمين!
ابتسمت الدكتورة وهي بتلف شاشة السونار قدامنا وشاورت على نقطة معينة وهي بتقول
شايفين النقطة دي ده كيس حمل... مبروك يا مدام نور أنت حامل
بصيت أنا وليل لبعض لثواني حسيت إن ليل نفسه تقل وعنيه بدأت تدمع بصيت للدكتورة وأنا بهز راسي يمين وشمال وكنت بدأت أعيط خلاص
بس.. بس الدكتور... الدكتورة قالتي إني مبخلفش!
مش دايما في حالات نادرة بتحصل فيها تبويض ممفاجئ... ألف مبروك ليكم هسيبكم شوية مع بعض
قامت وسابتنا وأنا كنت لسا مش فاهمة هي قالت إيه
سمعت... سمعت يا ليل سمعت هي قالت إيه أ.. أ.. أنا... أنا.. حامل!!
قرب ليل مني ومسح دموعي وهو بدأ يعيط معايا من الفرحة
يمكن ده جزاء أطفال الدار اللي رعيناهم يمكن ربنا استجاب لدعواتنا في الحرم يمكن استجاب لدعوة طفل من أطفال الملجأ وهم بيدعولنا إننا نجيب بيبي صغير عشان يلعبوا معاه! مش عارف يمكن ايه بالظبط... بس اللي عارفه ومتأكد منه إننا هنكون ماما وبابا
حضڼي بعدها وفضلنا نعيط شوية في حضڼ بعض ومكانش في صوت في المكان غير صوت عياطي والدكتورة بصراحة سابتنا براحتنا لدرجة إني كنت بدأت أنسى إننا في مستشفى أصلا
بعد ما هدينا شوية مسح دموعي وقالي بصوت واطي وهو بيضحك وسط دموعه
لو كنت رفضتي إننا نتجوز وخلتيني راكع قدامك على الأرض يوميها كان زماني دلوقتي بقيم الليل وبدعي
ضحكت وأنا بمسحله دموعه هو كمان وبقوله
كنت هتدعي عليا
هز راسه برفض وهو بيسند راسه على راسي
تؤ... كنت هدعي إنك تكوني نصيبي بردو
_تمت
روان_سالم_محمد
سرمدية
متنسوش تتفاعلوا على الإسكريبت وهستنى رأيكم في الكومنتات وقولوا رأيكم بصراحة لأني بقالي مدة كبيرة
جدا مكتبتش رومانسي والجو ده
