اسكريبت بقلم سوار 1

فكرة .
دي كانت جملة مالك ليا وهو شايفني واقفة بتفرج ومش بختار بصراحة لما أنس قالي أننا هنجيب الدهب النهاردة....خفت يكون مالك مش عامل حسابه 
وكنت عايزة اعترض بس كانوا اتفقوا .
رديت بابتسامة بسيطة بعد ما بصيت لأنس اللي واقف قريب مننا 
عارفة إنك أكيد عامل حسابك بس أنا فعلا مش عارفه اختار ايه .
طيب ممكن أختارلك .
أكيد اتفضل .
قولتها وبعدت خطوتين علشان يعرف ينقي .
بمجرد ما سمحت ليا اختار مكانها وأنا اتحمست ...كنت بدور بعيني وسط الخواتم وأنا الفرحة هتنط من عيني لأ يا جماعة هي نطت خلاص .
بصي .
وريتها الخاتم اللي قصدي عليه كان خاتم توينز فيه فصوص صغيرة... وشكله لطيف ومميز.
جميل خالص ورقيق كدا .
يعني عجبك ولا نشوف واحد تاني .
لأ دا جميل أوي كمان أنا مش بحب ألبس خواتم يعني فهو مناسب أوي .
طيب شوفي انت بتفضلي ايه أساور سلاسل ... .
بصراحة أنا مش عايزة إلا الخاتم والدبلة وأنا كدا كدا مش بحب الاكسسوارات .
هز رأسه برفض غالبا مفكر إني بعمل كدا علشان أراعيه في الفلوس ...
ودا حقيقي فعلا هو داخل على فترة تجهيز وشقة وموال ما يعلم بيه إلا ربنا.
لحقته قبل ما يتكلم 
على فكرة أنا مش بعمل كدا علشان الفلوس أنا مش بحبهم ومش هلبسهم ...فليه نجيبهم .
بس دا حقك بصي هاتي ومش ضروري تلبسيهم .
وايه لازمتها يتركنوا وخلاص....
وبعدين أنا واثقة إنك مش هتاكل عليا حقي وهخلي بابا يمضيك شيكات علشان تتطمن .
ضحك بخفة وهو بيقول 
إذا كان كدا معلش...
يلا نختار الدبل سوا .
اختار ليا دبلة رقيقة وناعمة وأنا اختارتله دبلة لونها أسود فخمة كدا ...بالله ماشية مع الطقم .
خلصنا وأنا رحت أوري ماما وخالتو سمية اللي اختارناه وهما حاسبوا الصايغ....وسيبنا الحاجة علشان يظبطها على المقاس .
وبعد يوم طويل أخيرا هحط رأسي على المخدة وهنام افتكرت الحوار اللي دار بيني وبين مالك ...يمكن يبان عادي بس كون أنه يسمعني ويناقشني دا شئ كويس .
نمت وأنا بفكر يا ترى يوم الخطوبة هيكون عامل إزاي .
يتبع 2 ...
الفصل الثالث 
يا خالد ....البدلة جات من عند المكوجي ولا لسه .
ناديت عليه وأنا بجري في الشقة لسه جاي من عند الحلاق بعد ما ظبطت نفسي ....بس اتأخرت .
أه يا مالك متقلقش جبتها من شوية وعلقتها علشان متبوظش ....ادخل بس خدلك دش بسرعة وأنا هظبط باقي الدنيا .
بصيت له بامتنان وحضنته وبعدين أخدت الهدوم وجريت علشان متأخرش .
النهاردة الخطوبة الأيام فاتت بسرعة كانت قمة المرمطة حرفيا...اضطريت أخد ٣ شيفتات ورا بعض علشان أعرف أخد إجازة النهاردة.
دا غير التجهيزات و الخواتم اللي عند الصايغ .
ابتسمت بخفة وأنا بفتكر اني طلبت منه يكتب أسمينا على الدبل من جوا اسمي على دبلتها واسمها على دبلتي ....حسيت إني مراهق سيكا بس مش مشكلة المهم اني مبسوط .
أخدت دش بسرعة و بعدين لبست بدلتي كان لونها بيج يشبه لون فستان زينب .
يا خالد الحاجة وصلت ولا لسه .
كنت بظبطت شعري وأنا بناديه تاني ....وبجد هو اتمرمط معايا أوي الفترة دي .
أه يا مالك الحاجة الساقعة وصلت والدهب وصل بردو متقلقش .
تسلم يا غالي والله بس أنا مش عارف حاسس إني ناسي حاجة مهمة .
اليومين اللي فاتوا كانوا ضغط أوي فكتبت الحاجات في نوتة ...بس هي راحت فين